Xalqaro futbol federatsiyasi 2007-yilning eng yaxshi futbolchisi nomiga munosib bo`lgan uchta futbolchini aytib o`tdi. Ulardan biri 17-dekabrda Syurixda “Brilliant to`p” bilan mukofotlanadi. Bular Kaka, Krishtianu Ronaldu va Lionel Messidir.

FIFA bu nomzodlarni barcha klublar bosh murabbiylari va jamoa sardorlari orasida o`tkazilgan so`rovnomaga ko`ra aniqladilar. “Brilliant to`p” uchun 30 ta futbolchi kurashishdi. Bu mukofot uchun birinchi nomzod sifatida Kaka e`tirof etilmoqda. Kaka Chempionlar ligasida “Milan”ning g`alabasiga ulkan hissa qo`shdi, desak yanglishmaymiz. Shuningdek Kaka bu yil “Oltin to`p”ni ham qo`lga kiritdi. Krishtianu Ronalduning sa`yi-harakatlari tufayli “Manchester Yunayted” Angliya chempioni bo`ldi. 17 marta raqiblar darvozasini ishg`ol etgan Ronaldu turnirning eng yaxshi o`yinchisi nomiga munosib topilgan edi. ”Barselona” jamoasining hujumkor yarim himoyachisi Lionel Messi bu mukofot nomzodlari orasida autsayder deb qaralmoqda.